மயங்கும் இதயம்

வேப்பமர அசைவில் நான் பார்ப்பதென்ன
.....வேகம்போகும் காற்று காதில் சொல்வதென்ன!

காலம் நல்ல காலம் இனி எந்நாளுமே
.....கடந்துபோன சோகம் யாவும் பறந்தோடுமே!

பறக்கும் காகம் சிறகை ஆட்டி கரைவதென்ன
.....பாடும் குயிலின் பாட்டிலுள்ள அர்த்தமென்ன!

மழையின் தூறல் குளிரும் சாரல் ஊதலென்ன
.....மண்ணின் வாசம் நெஞ்சின் ஆழம் இனிப்பதென்ன!

தூறல் பட்டு பறவை யாவும் தூங்கப் போனதோ
.....மரத்தின்கைகள் மழையின்சுகத்தில் ஆட்டம் கொண்டதோ!

வெள்ளைக்கொக்கு தொல்லையென்று கூட்டைத் தேடுதோ
.....எல்லாம் இனிமேல் இன்பம் இன்பம் ராகம் பாடுதோ!

தென்றல் சுகத்தில் மயங்கும் இதயம் துணையைத் தேடுதே
.....கைகள்கோர்த்து நெஞ்சில்சாய்ந்து கதைகள் பேசுதே!

கன்னத்திலே இதழ்கள் பேசி காதல் செய்யுதே
.....எண்ண மெல்லாம் இனிமைபொங்கி நிரம்பி வழியுதே!

கண்ணில் நிறைந்த காதல்மச்சான் நெஞ்சம் சேருதே
.....காதல்குயிலின் கானம் கேட்டு உள்ளம் மயங்குதே!

சிலுசிலுவென்று தழுவும் காற்று சிந்தை யள்ளுதே
.....சிரிப்பு இனிமேல் நிரந்தரமென்று என் மனம் பாடுதே!

-சுமஜ்லா